Ghar zindagi me ek-do baar hi banta hai. Zyada-tar galtiyan neev daalne se pehle hoti hain, aur unka kharcha baad me lakhon me aata hai. Ye 10 kaam pehle kar lo.
1. Plot ke papers check karo
Registry, mutation, allotment letter (HSVP plot ho to), aur ye ki plot par koi loan ya dispute to nahi. Plot ka exact size aur road width bhi papers se match karo.
2. Apne plot ke niyam jaano
Kitna ground coverage, kitna FAR, kitni height aur kitne floors allowed hain, ye sabse pehle dekho. FAR Calculator se 1 minute me pata chal jaayega.
3. Soil test karwao
Mitti kaisi hai, isi se foundation ka design tay hota hai. Bina soil test ke foundation ya to zaroorat se zyada mehenga banta hai ya kamzor.
4. Family ki zaroorat likho
Kitne bedroom, parents ke liye ground floor par kamra, parking, puja room, home office, aur kya aage chal kar floor kiraye par dena hai. Ye list architect ko pehli meeting me do.
5. Vastu shuru me hi plan karo
Entrance, kitchen, master bedroom aur puja room ki jagah naksha banate waqt hi tay karo. Baad me badalna mushkil aur mehenga hai. Hamara free Vastu Check try karo.
6. Poora naksha final karo: 2D, 3D aur structure
Floor plan, 3D elevation, structural drawings, aur electrical/plumbing layout, sab kuch kaam shuru hone se pehle. Beech me badlaav sabse bada budget-killer hai.
7. Naksha approval lo
Registered architect se naksha sanction karwao. Bina approval ke construction par penalty ya sealing ka risk hota hai.
8. BOQ banwao
BOQ (bill of quantities) me har item ki quantity, brand aur rate likha hota hai. Isse contractors ke quotes ki seedhi tulna hoti hai, aur “extra” ke jhatke nahi lagte.
9. Contractor ke saath likhit agreement
Scope, brands, timeline, penalty, warranty aur payment schedule, sab likhit me. “Bharose par” kaam sabse zyada jhagde laata hai.
10. Payment milestone ke hisaab se
Plinth, har slab, brickwork, plaster aur finishing jaise stages par payment do, aur har stage par quality check ke baad hi. Bada advance kabhi mat do.
Shuru karne me madad chahiye?
Space Shastra Architects 2016 se Faridabad aur Delhi NCR me 50+ ghar design aur build kar chuka hai. Apna estimate dekho ya free site visit book karo. Call / WhatsApp: +91 98992 21550.